Dmitriy Nikolaeviç Kara Çoban mayın 27-dä 1933 yılda çiftçi, ama büük kulturalı ayledä duudu. Anası Anna Konstantinovna bilärmiş beş dil, bobası – Nikolay Nikolaeviç virtuoz kemençeciymiş. Varmış küçük bir parça topracıkları evin yanında, angısının bereketinnän yaşarmışlar hem tutarmışlar birkaç koyun.

Geçirmişlär çok zoor vakıtları, etişmemezlik. Bobası kemençesini satmış diil sade diri kalmaa, ama läzımmış taa oolunu da üüretmää.

Tamannayıp 17 yaşını, Mitika çıkmış küüdän, gitmiş Harkova (Ukraina). Orada işlemiş hem avşam okulunda 8-ci klası bitirmiş.

1952-55 yılında Dmitriy yapmış askerlii Sovet Birliin günduusu tarafında. Oyandan Dmitriy getirmiş bobasına başka, eni kemençä, angısını almaa deyni, işlemiş demir yolunda kendi dinnenmäk günnerindä. Pek sevinmiş bobası bu baaşışa. Askerliktä Kara Çoban başlamış resim etmää.

Askercilik zamanını başardıktan sora, Dmitriy gitmemiş dooru evä. O kalmış Kişinövda, girmiş üürenmää I.E.Repin adına resim okuluna.

Gelip evä, anasınnan hem bobasınnan buluşmaa, başka istämemiş geeri gitmää, zerä nicä kendisi annadardı: «Başladım duymaa, ani taa sıkça çekettim çetkaciin erinä tefteri yazallan elimä almaa».

1957-58 yılda Dmitriy Nikolaeviç Kagulda pedagogika kolecindä üürenmiş. Beşalma okulun da üüredici işlemiş. Büüklär dä, küçüklär dä mayıllı korumaklan kullanarmışlar gagauz dilindä ilk üürenmäk kiyatlarını. Taa bir ilk kırlangaç gibi gagauzlara deyni oldu kiyat   «Bucaktan seslär» (1957), neredä topluydular gagauz folklor yaratmaları hem gagauzların ilk yazıcıların şiirleri. Orayı D.Kara Çobanın şiirleri da katıldı.

Genç, 24 yaşında çocuk çok okuyardı, da kendi duygularını sakınnı başladı insan daavasına çıkarmaa. Ilktän başladı kısa peetlerini, sora annatmalarını tipardan çıkarmaa.

1958 yılda D.Kara Çoban girdi Moskvada M.Gorkiyin adına literatura instituduna, neredä zaoçno üürenärdi, Beşalma okulunda üüredici işlärdi, şiir yazardı, tiparlardı, resim edärdi – hepsi bu işlär olardılar barabar.

Kara Çobanın büük yardımcısıydı yaşamakta da, işindä da onun karısı Zina. O görardi ilk resimneri, seslärdi ilk yazıları.

Institutta yazıcının diplom işi oldu şiir toplumu «Ilk laf», angısı gagauzlara birdän sevgili oldu.

1965 yılda D.Kara Çobanın oldu Sovet Birliin Yazıcıların azası. Açıkladı büük problemayı, ani tipardan çıkêr aaz kiyat gagauz dilindä, nekadar da çıkêr, onnarın tirajı aaz…

1965-66 yıllarda Dmitriy Nikolaeviç işledi Beşalmada bibliotekada. Kendisi kemençedä çalardı, dolayınına toplardı ölä insannarı, angıları onun gibi üüseklää çekilärdi, muzika, şiir, incä zanaatı sevärdi. Yapardı küçük konferenţiyalar.

Küüdä o yıllar çalışardı «Beşalma radio dalgası». Hazırlardı kolverimneri genä hep o D.Kara Çoban.

Ona insan çekilärdi zorluunnan danışmaa, sevinmeliini pay etmää.

Çok işledi o kendi kısa yaşamasında, çok işlär yarattı.

NadejdaTopal

Gagauziyanın merkez bibliotekanın izmetçisi