2022-ci yılın orak ayın 7-dä olacȇk 100 yıl nicä duudu büük gagauz aydınnadıcısı hem yazıcısı, profesoru, gagauz dili hem literaturası doktoru Dionis Nikolaeviç TANASOGLU duuma günündän.

Dionis Tanasoglu çok taraftan talantlı bir adam – yazıcı, bilimci, folklor aaraştırıcısı, pedagog. Gagauziyanın şannı vatandaşı. Çok vakıt yazısız yaşayan gagauz halkına deyni başka bilim zaametçilerinnän barabar D.Tanasoglu hazırladı gagauz dilinin ilk alfabetini, angısı kabul edildi devlet uurunda 1957-nci yılda. Bu Tanasoglunun en büük hem paalı işi halkımız için.

Dionis Tanasoglu denedi kendisini literaturanın hepsi janralarında. Yazdı şiir, pyesa, poema, düz yazı. Onun kalemin altından çıktı gagauz dilindä ilk roman «Uzun kervan». Hep ölä 1958-ci yılda o hazırladı hem tiparladı ilk literatura almanahını «Bucaktan seslär». Burada ilk sıra basıldı folklorumuzdan örneklär hem o zamannarda peydalanan ilk gagauz yazıcıların yaratmaları.

Elli yıldan zeedä D.Tanasoglu izmet etti gagauz kulturasına. Bu yıllarda tipardan çıktı kiyatlar: «Çal türküm» (1966), «Adamın işleri» (1967), «Hoşluk» (1970), «Gençlik türküleri» (1975). Yazdı iki pyesa «Bucakta yalın» (1974), «Oglanın sevdası» (1981) h.b.

Nasıl da hepsindä yaratmalarında, D.Tanasoglu poeziyasında da gösterer kendini nicä bir vergili şair.

Bütün yaşamasında Dionis Tanasoglu büük zaamet etti ki gagauz halkın dili, literaturası, istoriyası, kulturası ilerlesin. Onun yaratmaları, paası olamaya – baaşışţ yaptıkları onun diveç. Gagauz halkı ömür boyunca bu varlıı koorusun hem saysın lääzım.

Nadejda Topal.

Gagauziyanın merkez bibliotekasının izmetçisi.