Geldi altın güz zamanı, açan insannar aullarnda büyän üzümneri toplȇrlar, taazä şırayı fıçılara dökerlär. Tezlää olacȇk eni şarap. “Onun yapmasını da içmesini da becermää lääzım”, - sölerlär arif gagauzlar. Anılȇr halkımız kendi ev şarabınnan. En becerikli çorbacılar konkurslarda ödülleri kazanȇrlar. Bölelerin birisi - Çerven aylesi, angısı kendi becermeklerini zenginneştirdi da “Kara Gani” brȇndını kurdu.

Devletlerdä, nerеdä gün duȇr hem nerеdä o batȇr, bir laflan bütünä Evraziyada, var nicä dil salt görmää, ama datmaa da gagauz şaraplarını. “Kara Gani” brȇndı, artık biliner dünnenin çoyu devletlerindä. Nica annattı Valkaneş kasabasının “Kara Gani” şarap çorbacılıın başı Larisa Çerven, ilk şaraplar burada şişelerä döküldülär 2016 yılda. Büünkü gündä onnar satılȇrlar Büük Britaniya, Yaponiya, Franţiya hem başka devletlerdä.

Gagauziyanın güneşli baalarında büyän üzümnerdän “Kara gani” çorbacılıında yılda 10 bindän zeedä şişä şarap doldurulȇr. Da kim onnarı içer ne daadını ne da kokusunu artık unutmȇr. Zerä bu çorbacılıkta bütün canını koyȇrlar, ki gagauzların adetlerini koruyarak taa da kaliteli şarpaları yapmaa.

“Biz 8 türlü şarap yapȇrız. Var neetimizdä bu sayıyı zeedelemää. İsterim nışannamaa, ani bizim şaraplarımıza gagauz aadlarını vereriz, bölä nicä “Altın” hem “Çotra”, - sölеdi Larisa Çerven.

Bu aylä şarapçılıklan zanaatlanȇr 100 yıldan zeedä. Pötr Çerven 80 yaşını aykırladı. O islää tütȇr akılında dädusunun bobasını. Sert, ama çalışkan gagauzu Ganiyi, angısından da hepsi çekedildi. Pötr Evgenyeviç tutȇr akılında kendi dä-dusunun laflarını, angısı sölärmişti, ani becerikli hem ii çorbacıda şarap lääzım etişsin enidän eniyadan. Şindi Çerven aylesindä şarap yapılȇr eni tehnologiyalara görä. Da o etişer birkaç yıla. Pötr Çervenin oolu Görgiy açıkladı, ani onnar neetli çıkmaa taa üüsek uurlara, ki gagauz şarapları andırsınnar halkımızı dünnenin çok taraflarında.

Valkaneş kasabasının “Kara Gani” şarap çorbacılıında üzüm sıkmak için maşinalar, eni şarabın kaynaması için hem bundan sora onu tutmaa deyni fıçılar hem başka tehnika Almaniyadan hem Franţiyadan getirilmä. Larisa Çerven söler, ani onnar 10 ektar baa işlerlär da sadecä bu üzümnerdän kendi şaraplarını hazırlȇrlar. “Var burada 30 yıllık çotukalr. Onnarın üzümnerindän yapılı şarabın dadı da başka. Onada var terruar”, - urgulȇr çorbacılıın başı. “Terruar” - maanalı bir laf. O gösterer nekadar derin toprak içinä girerlär çotukların kökleri, da onnar besleyeräk üzümneri vererlär onnardan yapılı şaraba gözäl daadı, rengi, hem kokuyu. Pötr Çerven seviner, ani onun uşakları kullanarak zamandaş tertipleri şarabın yapmasında unutmȇrlar hem ne taa önemli koruyȇrlar evelki adetleri da.

Datmaa ev şarabını var herkezin kolayı kim geler Valkaneş kasabasının “Kara Gani” şarap çorbacılıına. Burada diil salt serin maaza dolu şaraplan, ama gözäl aul da, angısı donaklı gagauz adetlerinä görä hem kendi muzeyi da var.

Nadejda KUYUJUKLU.