Eni üürenmäk yılın çeketmesindän Gagauziyanın hepsi okullarında birinci klaslarda uşaklar üüreneceklär resim hem tehnologiya terbietmesi predmetleri ana dilindä. Bu iki predmetin üürenmesi gagauz dilindä bakılȇr maasuz Gagauz dilin ilerlemesi hem genişlenmesi için kanona görä. Onu GHT kabletti 2018-ci yılın canavar ayında. Kuruldu iş grupası, angısına girdilär Üüretim bakannıın hem KDU zanaatçıları. Onnar çevirdilär gagauz dilinä resim hem tehnologiya terbietmesindä metodologiyaları.

Ama avtonomiyada var üüretmek kurumnarı, neredä gagauz dilini üürenmeerlär. Ama kanonnan bakılȇr bu iki predmetin üürenmesi gagauz dilindä. Üüretim bakannın başın yardımcısının Nadejda Gaydarjinın laflarına görä bakannık aldı esaba bu özellikleri.

„Üüretmek kurumnarı için neredä gagauz dili üürenilmeer bakannık aarayacȇk üüredicileri, angılar götüräbileceklär bu iki predmeti ana dilindä”, - haberledi Nadejda Gaydarji. O nışannadı, ani liţeyların hem gimnaziyaların çoy hazır enilikleri kullanmaa. Hep öla eni üürenmäk yılın çeketmesindän resim predmetini gagauz dilindä götüreceklär uşak başçalarında.

MARİYA KASIM.