Çadır kasabasının Dionis Tanasoglunun adına milli teatrusunun aktörları Todur Zanetın pyesasına görä «Mozgoroy» masal spektaklisini koydular. Rejisör - M.Rezuneţ. Spektaklinin premyerası Hederlez ayın edisindä geçti.
Bu yaratma gagauzların evelki yaşamasını gösterer. Açıklȇêr halk adetlerini hem dedelerin kimi inanmaklarını. Bundan kaarä, açıklȇêr ölä folklor personajların nicä Mozgoroy, Rusali, Topal Canavar hem Cadı babusu, özelliklerini.
Spektakli açıklȇêr halizdän mi Mozgoroy okadaradak korkunçlu hem hatalı nicä onun için legendalarda yazılı; okadar mı kaavi Rusalinin betvaları?
Hep ölä siiredici görecek, nicä mifologiya personajların hem insanın aaralarında baalantılar kurulȇrlar.
Spektakli gösterer geroyların hem insanın aaralarında konfliktın maanasını. Maasuz bu yaratmada Cadı babusu hem onun yardımcısı Mır-mır Kotoban insandan azetmeerlär da onnara türlü kötülükleri yapmaa çalışȇrlar. Mozgoroy sa savaşȇr insanın hem mifologiya personajların aaralarında dostluk baalntılarını kurmaa. Rusali sa daavacı gibi olȇr iiliin hem kötülüün aaralarında.
Neylän bitecek masal personajların dartışması annaşılȇr sadece spektaklinin bitkisindä. Bu elbetki çeker siiredicilerin dikkatını.
“Mozgoroy” spektaklisini havezlän siiretmää Çadır kasabasının hem Gagauz Erin kalan yaşayan punktların yaşayannarı geldilär. Çadırın başı A.Topal kendi ofiţial sayfasında facebook soţial saytında yazdı, ani spektakli geçirildi alarak esaba hepsi ȇpidemiologiya kurallarını. Hep ölä o şükür etii aktörları onnarın işi için. «İnsannar özledilär busoy olayları. Onnar sevindilär, ani artık oldu kolaylıkları offlayn rejimindä spektakliyi siiretmää», - yazdı A.Topal.
Kendileri aktörlar premyeraya avtonomiyanın başını İ.Vlahı teklif ettilär. Başkan teklifi kabletti. Spektakliyi siirettiktän sora sţenaya çıkıp Çadır kasabasının Dionis Tanasoglunun adına milli teatrusunun aktörlarına şükürlük laflarını söledi: «Siz gagauz dilini hem adetlerini ilerletmää yardım edersiniz. Sizin yardımınızlan kulturamızı taa ii hem da taa deerindän annȇrız. Koronavirus pandemiyası yaşamamızı diiştirdi. Ama sizin spektaklileriniz, sizin işiniz - optimizma sızıntısı. Saa olunuz! Çok taa meraklı olaylar ileridä ko sizi beklesin!». O hep ölä urguladı, ani bitkii birkaç yılın içindä regionun kuvetleri türlü kararları kablettilär teatruculuk zanaatı ilerlesin deyni. Hep ölä finans yardımı da yapıldı. Bu verdi kolyalık zenginnetmä teatruların varlıını, ki aktörlara taa kolya işlemää olsun.
Aleksandra ÇOBAN.