Ne zorluk seni kırdı

Ne zaman dolaştırdı

Allahım, koru topra,

Gagauz Eri, Bucaa.

Dünnedä var çok devlet. Onnarın arasında – bizimdä Gagauziya. Bu devlettä biz yaşêêrız – o bizim Vatanımız. Düşünärkän Vatan için, biz düşüneriz geçmiş hem şindiki zamannar için, kahramannar için, şannı insannar için.

Hepsi bunnar – bizim istoriyamız, bizim Vatanımız! Vatan hiç kimseyin bir da zaman aklından çıkmaz!

Herbir insan sever duuma tarafını. Bän da severim Gagauziyayı.

Kıran ayın 23-dä bizim Vatanımızda büük hem paalı bir millet yortusu – Gagauz Avtonomiya Bölgesinin kurulma günü.

28 yıl geeri, 1994-cü yılda, dekabrinin 23-dä Moldova Respublikanın Parlamenti bir kanon kabletti, onun adı «Закон об особом правовом статусе Гагаузии».

Moldova Respublikanın hem Gagauz Respublikanın arasında iki taraflı annaşmak imzalandı. Gagauziyanın başkan hem Halk topluşu deputatları ayırılêr , kuvet organnarı olêr. Kendi devlet simvolları Moldovanın devlet simvollarınnan. Devlet hem millet simvolları göstererlär Vatanımızın geçmişni, birliktä, serbestliktä yaşamasını şindiki hem gelecek zamanda.

Bu zaman süresindä çok zaamet döküldü, ki gagauzlar nicä halk korunsunnar. Gagauzlar serbestlii hem dooruluu sevän bir halk. Gagauziyanın üzünü diiştirdi halkımız, çalışkan insannarımız, dedelerimiz, angıları korudular dilimizi, adetlerimizi, açtılar bizä yol gözäl yaşamaya sıcak tenni zengin topraklarda. Bu büünkü gözellii, bu sıcaklık tarafı, angısı taa çok gül başçasına benzeer, lääzım diil sade sevmää, ama korumaa da!

Bän kısmetliyim, ani duudum bu erdä. Bän hodullanêrım benim gözäl Vatanımnan.

Kutlêêrım hepsini Gagauziya yaşayannarı bu yortuylan. Adêêrım hepsinä saalık, usluluk, annaşmak, sevgi, bereket.

Yaşasın Gagauziya!

Nadejda TOPAL

Gagauziyanın merkez bibliotekasının izmetçisi.