Komrat dolayın 200 yaşayanına “Basıbüük” hem “Evropa Etim Der” Türkiye baamsız yardım kurumnarı imäk mallarını verildilär. Bu kurumnar artık 10 yıldan zeedä kendi işini götürer. Onnarın kurucuları Almaniyada yaşȇrlar. Ama bu koymȇr köstek onnara iilikçılik uurunda işlerini götürmää hem türkiyenin vatandaşlarınnan birliktä bu zaametilerini ilerletmää.

“İnsannara, onnarın zor zamannarında yardım ederäk kendini taa kısmetli yapȇrsın”, - söler “Evropa Etim Der” kurumun başın yardımcısı Hasan Kuyuldar.

“Basıbüük” hem “Evropa Etim Der” Türkiye baamsız yardım kurumnarı dünnenin 40 devletin yaşayannarına yardım eder. İnsannarın zorlarında bulunȇr.

“Sellerdän, er tepremesindän zarar görän insannara en ilkin yardım ederiz. Üüsüz uşakları tutturȇrız. Afrikada, neredä suylan zorluklar var - pınar kazȇrız. Geçennerdä Bolgariyanın hem Rumıniyanın fukaarä insannarına yardım getirdik”, - annattı Hasan Kuyuldar.

“Basıbüük” hem “Evropa Etim Der” Türkiye baamsız yardım kurumnarı insannarı dinnnerinä hem milletlerinä görä pay etmerlär, yardım lääzımsaydı - mutlaka yardım ederlär.

“Basıbüük” kurumun başın Mahmud Basıbüükün laflarına görä, bu yardım akţiyaları başarılı başa çıksınnar deyni büük kuvet hem zaamet çok insan koyȇr. En ilkin onnar Türkiye hem Almaniya devletlerin vatandaşları, angıların var kolaylıkları birkimseyä yardımcı olmaa.

“Gagauz Erinä seftä gelmerim. Benim bırada artık yardımcılarım da var”, - açıkladı Mahmud Basıbüük.

Geçän yıl “Basıbüük” baamsız kurumu gagauz kız futbol komandasına sport giimnerini baaşladı. Bu sıra sa bu kurum birliktä “Etim Der” dernäännän yalnız hem fukaarä yaşayan insannara, zor durumda bulunan aylelerä imäk mallarını getirdi. Onnarı kırkar evä Kongaz, Kongazçık, Beşalma hem Dezginjada küllerindä hem da Komrat kasabasında daattılar.

Kimä lääzım yardım, kim zor durumda bulunȇr – bu bilgileri baamsız kurumnar primariyalardan kablederlär. Soţial uurunda izmetçlär kendi yaşayan punktlarında herbir aylenin durumunu islää bilerlär. Onnar da maasuz listeleri kurȇrlar.

Busoy yardım kurumnarın hem primaryaların aaralarında baalntı köprüleri peydalansın deyni Lidiya ostaş zaamet eder. O “Basıbüük” hem “Evropa Etim Der” kurumnarını avtonomiyada temsil eder. “İnsannar bu yardıma pek sevinerlär. Umutlanȇrım, ani bu akţiyalar ilerleyeceklär”, - urguladı Lidiya Ostaş.

Kendileri Mahmud Basıbüük hem Hasan Kuyuldar adadılar, ani Gagauz erinä mutlaka genä geleceklär, hem nicä şindiyadak diil boş ellärlän.

Nadejda KUYUJUKLU.