Gelän yıla Gagauz erin baş kasabasında plana koyuldu ekologiya durumunnan baalı problemanın bir payını çözmää. Kollektor artık hazır «Geofizika» mikrorayonunda. Eni kollektora hem su verici sistemasına ekleneceklär bu dolayda bulunan hepsi yapılar. Hep ölä eni sport stadionu eklenecek. Bunun için Komrat kasabasının başın yardımcısı Georgiy Sarı haberledi. «İkincii kollektorda, angısı N.Tretyakovun aadına sokaanda Yalpıya dooru bulunȇr, işlär hep taa giderlär. Uzmannar adadılar, ani bu yılın bitkisinä kadar o da artık hazır  olacȇk. Bu kollektorlarda kaavi nasoslar olacȇklar. Onnar suları kendileri çekeceklär da paklamak sistemasına onnarı doorudacȇklar. Kasaba içindä taa bir kollektor lääzım düzülsün. O «Tukanäska» mikrorayonunda mutlaka olsun lääzım. Açan burada da bu tertiplär peydalanacȇklar biz yakışacȇk deyelim, ani Yalpı deresinnän baalı zor ekologiya durumu çözüldü», - söledi Georgiy Sarı. Bu uurda işlär 2019-cuu yılda başladılar. Komradın hem regionun büdjetlerindän bu kollektorların düzülmesi hem derenin paklaması için 7 million leydän zeedä verildi. Bu yıl «Geofizika» mikrorayonunda kolektorun düzülmesi için Komrada devletin Ȇkologiya fondundan 8 million 300 bin ley verildi.

M.KASIM.