“Burada canın raatlanȇr” – bölä aydarın yaşayannarı sölerlär pınar için, angısı küüyä yakın kırın may orta erindä bulunȇr. İnsannar inanȇrlar, ani onun suyu verer saalık hem kuvet. Sık burada var nicä kaarşı gelmää yolcularlan, angıları durgundular dinnenmää hem susuzluunu geçirmää. Pınara götürer dar yol, angısının kenarlarında açȇrlär güllär hem lavanda. Burasını kırnaklıkta tutȇrlar Aydar küüyün yaşayannarı Elena Nikioglo hem Angilina Manastırlı. Onnar annattılar, ani pınar 1950-ci yıllarda kurulmuş.
“Kır içindän yol geçardi. O garaya götürärdi. Ama sora yolu başladı gezilmemää da onu kapadılar. Pınar başladı kullanılmamaa da körlendi”, - söledi Elena Nikioglo.
Bu pınarı çok yıl insan kullanmamış. Bekim enidän da kullanılmayaceydı, er olmasaydı bir olay, söledi Elena Nikoglo.
“Bir insanın düşüna Panaıya geler. Da söler, ani pınar enidän işlesin lääzım. O kaarı komratlı. O getirdi 200 kök gül”, – annattı Aydar küüyün yaşayanı.
200 kök gül dikildiktän sora, aydarlılar alȇrlar karar birleştirmää kuvetlerini da düzmää, donatmaa pınarın dolay yanını. Onun yapıler aazı, koyulȇr örtüsü. Burada peydalanȇrlar ikonalar pınar ayozlanȇr. Herbir isteyän Aydardan, Çadırdan kuvedinä görä yardım etti, söler E.Nikioglo: “Bän ozaman İ. Vlaha danıştım, ki yardım etsin paraylan. O lafını hiç ikilämedi, yardımcı oldu”.
“Burada canın raatlanȇr”, - söler Angılına Manastırlı. O burayı geldiinän biler, ani biraz vakıt hepsi islää olacȇk.
Panaıyanın aadına pınarın kurbanı ceviz ayın 21 nışannanȇr. E.Nikioglo annattı nasıl geçer bu gün: “Geler popaz. Geçirer burada yortulu slujbayı. İnsannar ayazma alȇrlar. Masa kurȇrız yol boyunda. Ne varsa. İnsanı ikram ederiz”.
“Ceviz ayında burası taa gözäl olȇer. Açerlar güz çiçekleri. Yolcular durgunȇrlar serin su içmää hem dinnenmää”, - annaderlar karılar, angıları buncak yıl saymayıp zaametlerini pınarın dolay yanını tertiplerlär.
Bu erin var taa bir gözäl adeti - düünnär bıryı gelerlär. May her cumertesi hem pazar (açan düünnär yapılȇrlar) burada gelinnär hem güvelär patredä çıkȇrlar hem inanȇrlar, ani burası uur onnara getirecek.
Alexandra COBAN.